main khujuron bhare sahraon mein dekha gaya hun -- Written by:-- NADEEM BHABHA

Kuch Alfaz

main khujuron bhare sahraon mein dekha gaya hun-----

maiñ khujūroñ bhare sahrāoñ meñ dekhā gayā huuñ

taḳht ke ba.ad tire paañv meñ dekhā gayā huuñ

lamha bhar ko mire sar par koī bādal aayā

kahne vāloñ ne kahā chhāñv meñ dekhā gayā huuñ

phir mujhe ḳhud bhī ḳhabar ho na sakī maiñ huuñ kahāñ

āḳhirī baar tire gaañv meñ dekhā gayā huuñ

tamam umr jale aur raushni nahin ki-------

tamām umr jale aur raushnī nahīñ kī

ye zindagī hai to phir ham ne zindagī nahīñ kī

sitam to ye hai ki mere ḳhilāf bolte haiñ

vo log jin se kabhī maiñ ne baat bhī nahīñ kī

jo dil meñ aatā gayā sidq-e-dil se likhtā gayā

duā.eñ māñgī haiñ maiñ ne to shā.erī nahīñ kī

bas itnā hai ki mirā baḳht Dhal gayā aur phir

mire charāġh ne bhī mujh pe raushnī nahīñ kī

mirī sipāh se duniyā larazne lagtī hai

magar tumhārī to maiñ ne barābarī nahīñ kī

kuchh is liye bhī akelā sā ho gayā huuñ 'nadīm'

sabhī ko dost banāyā hai dushmanī nahīñ kī

main aise moD par apni kahani chhoD aaya hun-----

maiñ aise moḌ par apnī kahānī chhoḌ aayā huuñ

kisī kī aañkh meñ paanī hī paanī chhoḌ aayā huuñ

abhī to us se milne kā bahāna aur karnā hai

abhī to us ke kamre meñ nishānī chhoḌ aayā huuñ

bas itnā soch kar hī mujh ko apne paas tum rakh lo

tumhāre vāste maiñ hukmarānī chhoḌ aayā huuñ

isī ḳhātir mire chāroñ taraf phailā hai sannāTā

kahīñ maiñ apne lafzoñ ke ma.ānī chhoḌ aayā huuñ

'nadīm' is gardish-e-aflāk ko maiñ chaak samjhā to

vahāñ par zindagī apnī banānī chhoḌ aayā huuñ